അന്യന്‍

അന്യന്‍

നീ എനിക്കെന്നും അന്യനാണ്
തിരിച്ചറിവില്ലാത്തവന്‍
മനുഷ്യന്റെ ഭാഷയില്‍
സംസാരിക്കുന്ന ദുര്‍ബ്ബലന്‍
ഭൂമിയെപ്പറ്റി മാത്രം പറയുന്നവന്‍
കാഴ്ചയിലുള്ളതു മാത്രം
പരത്തി പറയുന്നവന്‍
ആളുകള്‍ പറഞ്ഞു നീ അനന്യനാണ്
എനിക്ക് നീ അന്യനാണു
അസ്തിത്വത്തെ ചോദ്യം ചെയ്യുന്നവന്‍.

കട്ടിമീശയും കള്ളമനസ്സുമുള്ള
തത്ത്വദര്‍ശികള്‍ പറഞ്ഞു
നീ ഏകനാണ്
പരമകാരുണികനാണ്
ചിലര്‍ പറഞ്ഞു:
ചിന്മയനും ചിത്സ്വരൂപനുമാണ്
മറ്റു ചിലര്‍ പറഞ്ഞു:
കോവിലുകളില്‍ ഒളിച്ചിരിപ്പുണ്ടെന്ന്
ദീപാരാധനയ്ക്കു നട തുറന്നപ്പോള്‍
കണ്ടതു പഞ്ചലോഹ വിഗ്രഹം മാത്രം
തെരുവില്‍ മനുഷ്യരൂപങ്ങള്‍
വിശന്നു വീണു മരിച്ചപ്പോള്‍
ഭണ്ഡാരങ്ങള്‍ നിലവിളിച്ചില്ല
തുലാഭാരങ്ങളും ഉത്സവങ്ങളുമായി
നീ ഇരുട്ടില്‍ ഉല്ലസിച്ചു.